Oordelen
“Dames en Heren, doe me een plezier en bekijk onderweg alles kritiekloos. Ik erger me altijd zwart aan de mensen die veertien dagen met me door een land rijden en dan na afloop precies weten wat er allemaal verkeerd is in zo’n land.” Zo vertellen den chauffeur uns in de busse. Zo is ‘t wal. Wi-j kiekt deur ‘t raam van de busse naor boeten en onmiddellijk zegt der ene: “Mo’j zeen wat dat wief ne idioten hood op hef. Ha, ha, ik zol mi-j dood schamen.” En: “Wat is de weg hier slech, den staat hef hier schienbaor gin geld veur ne fatsoenlijken weg en dan mo’j nog tol betalen ok.” Noh jah, wi-j wet dan neet dat dee leu helemaol gin waegenbelasting betaald, dat de weg gewoon particulier eigendom is en dat de eigenaren ‘t hebben mot van ‘t geld dat de tol opbrech. “Dat ze dat neet anders doot”, denk i-j dan.
Dat dach den Amerikaan dee bi-j mi-j in ’n auto zat ok. “Wat doo’j toch in vredesname met al dee beume hier langs de weg, dat is joo laevensgeveurlijk?” “Jah, dee staot der noo eenmaol.” Ik wist gelukkig gin antwoord op de vraoge hoovölle leu zich hier dood jogen teggen de beume. Maor in elk geval te völle. “Trouwens, waorumme he’j de waege hier zo krom? Dat kost toch völ te völle grond? Maak ze toch recht. Dat is toch völle veurdeliger.”
Hee veel van ’t lachen haoste oet ’n auto ton e ne man zag fietsen met ‘n mandjen achterop en in dat mandjen…? Juust, een hundeken. Hee had ‘t leefste had dat ik effen stille heel, dan kon ne foto maken. Ton hee oet elachet was zae hee: “Wat doo’j hier toch in vredesname met al dee rothunde. Zee bescheit joo de hele boel, wat nog ongezond is ok. En zee brengt niks op. Da’s toch flauwekul?” Ja, ja, eigenlijk heffe geliek… Maor jah…
En wi-j maor praeken hoo ‘t in andere lande mot. Korts nog eleazene dat er in Afrika meer as zevven miljoen dood egaone bunt an malaria. En dat allene umdat wi-j hier vonn dat de DDT onmiddellijk af-eschaft moch worden. Daor zatten te völle naodelen an vaste. Wee zit noo ok te denken an de bestrijding van de malariamuggen?
En awwe dan in de busse zit en naor boeten kieket dan zegge wi-j: “Wat gek!” En “Dat ze dat neet anders doot.” “Ha ha, mo’j zeen, wat stom!”
Wi-j weet ‘t allemaole baeter. Wi-j wont in ‘n landjen dat minder inwonners hef dan Moskou en umgevving. Of andere grote staen as New York of Los Angeles. Medan op Sumatra, waor wi-j ‘t laatst zo ovver hadden, hef allene al ‘n paar miljoen inwonners.
Hoo kump ‘t toch in vredesname dawwe hier zonne verbeelding heb? Der kan neet wat gebeurn in de wald of wij weet precies hoo ‘t mot. Daor hewwe ok unze commentators veur. Dee zit hele daage veur de buis te kwaken hoo ‘t mot. I-j snapt neet dat de regeringen wieter hen zich neet laot bi-jstaon deur ’n stel Hollandse commentators. Dan wisten ze metene hoo ’t moch. Veur Bush en zo mot ‘t ok vreselijk gemakkelijk wezzen at e de beschikking hadde ovver ‘n stel Hollanders. Dan genk ‘t toch völle baeter?
Ik herinner mi-j nog dat ne partijafdeling oet ’n Drents dörpken zat te verkondigen dat Reagan (daor genk ‘t ton umme), dat Reagan noo endelijk begriepen moch dat ze in daor argens in Drente zien gedoo neet langer accepteern. Daor moche maor is terdege raekening met hollen. Ik kan mi-j veurstellen dat ze zich in Amerika rotschrokken en dat Reagan zien beleid onmiddellijk verandern.