Boom
Op 2 Mei 1946 kwam der een ende aan ‘t laeven van een van de bekendste inwonners van Wenters; namelek ‘n Dikken Boom in ’t Woold.
’n Dikken Boom stond vlakbi-j Roordink-Schoppert; ne boerderi-je van ‘t Scholtengood Roerdink. Den eke was de meujte waerd umme te bekieken en op olde toeristenkaarten steet hee ok altied an-egevvene. Heel wat leu gengen der op de fietse hen. Der was altied wal plaatse umme een zetken onder ’n Dikken Boom te zitten. Hee was kolossaal: dree-en-twintig meter hoge. As kindere stonn wi-j der met een boek teggenan en pakken mekare bi-j de hand. Twaalf kindere wassen der neudeg umme ’n boom helemaol te um-vatten.
Misschien wal vief eeuwen hef e doar estaone. Den ekel waor e oet is ekommne zol dan ongeveer in 1400 oet-elopene wezzen.
Wat zol den Dikken Boom allemaole hebben können verteln at e had können praoten?
Van de opkomst van ‘t grote scholtengood waor e zien lange laeven an te danken hef. Den riekdom en stabiliteit van scholtengood Roerdink hef der veur ezorgd dat ’n boom nooit ekapt is en zelfs as pronkstukke deens kon doon.
Völle geslachten hef ezeen kommen en gaon. Zag de grenze tussen Holland en Duutsland ontstaon. Op een haor nao had den boom in ’t Münsterland estaone en neet in ’t Gelderse. Hee maken den Tachtigjeurigen Oorlog met en misschien genk Suideras der in 1799 wal een zetken onder zitten ton hee prebeern umme de Fransen oet Holland weg te jagen. Dat mislukken indertied en kostten onder andere de Freule van Dordt ’t laeven. Kort veurdat ’n boom zelf dale ehaalt wordn kwamn de pantsercolonnes van de Geallieerden langs en maken hee den tankslag in ’t Woold rond bevrijding van Wenters met.
Maor den Dikken Boom wordn old en ’t völle dooie holt bovvenin wordn geveurlek veur de umgaeving. Teggenwaordig had ne boomchirurg misschien eprebeerd umme ‘m nog zetken in laeven te holln. Maor ok den stam onderan was vermolmd en der wordn endeleke beslotne umme ‘m toch maor dale te halen.
Op mansheugte was den umvang van Dikken Boom dree meter vief-en-zeventeg en der wordn eschat dat e wal darteg kubieke meter holt op-levern zol. Der meldden zich verscheidene kopers maor ovver de pries wordn ze neet zo gauw ens. Veural umdat ’t risico bi-j ’t dale haaln veur ‘n koper was. Eén van dee risico’s was schade an de Roordink-Schoppe.
Enfin, Benneman, ne bekenden holthandel, koch ’n boom en leet ‘m dale maken deur de holthakkers van Geesink oet Meddo. Dee leten ’n boom precies valln waor ze ‘m in gedachten hadden. Alleen ’t umme hakken was al de meujte waerd umme naor te gaon kieken. De Geeskink-mansleu wassen der twee dage met drok. Der ston völle volk umme hen en ne fotograaf leggen ’t vaste ton ’n Dikken Boom tenslotte dale kwam.
Holtzageri-je Meerdink moch ’n boom verzagen. Der kwammen planken van ne meter vief-en-zeuventeg breed vanaf. Ene planke bewaarn Meerdink veur zichzelf. Een half jaor veurdat oet ’t laeven kwam verteln e ziene knech dat ’t mooi zol vinn at er ne doodskiste van de planke van ’n Dikken Boom veur ‘m emaakt zöl wordn. En zo gebeurn ’t ok.