Feest
“Gao toch noo is in vredesnaame met nao hoes”. Jao jao, zea Jan, ut wordt tied. Ziene bedoelingen wazzen altied good maor um um van’n feest met nao hoes te kriegen was altied ne ellende. Noo ok, net woll’n ze an de deure an oet kumpe nog wear ’n paar kammeröö teggen waore nog wear neug ne borrel met wil drinken en zee met hem en dan staot ze met dat stel daor wear veur’t schap te hangen. “Kom noo Jan!” Maor de kearls drukt Mina nog wear’n appelkorntjen in de hande. “Vooruit Mina, pros.” En zo geet’t wieter, maor nao hoes gaon, hoo maor. Endelijke endelijke hef ze Jan zowiet. ’t Is nog’n gehannes um de fietse te vinden maor dan endelijke bunt ze op weg. “’t Wordt hoge tied zeg Mina. Ik heb met de naobers af e’praot dawwe umme acht uur wear op’t feest bunt. En wi’j mot nog melken en voorn, kom lauwe luk an jagen.” Jan mot höken datte met kump. Mina fietst eengaal zonne vief meter veur um en maor preaken dat ze an mot maken. “Wej wawwe doot”, zeg Mina… “wi’j gaot gauw effen melken en vaorn en dan köwwe nog net’n uurken meddagen en dan wear nao’t feest.” Dat liekt Jan ok gin gek idee. Al heffe groten zin umme drek maor effen lank oet te gaon liggen. Maor Mina bestelt um umme zich gauw andere kleere an te trekken en dan te melken. Mina vaort de varkene en de hoondere en dan grip ze ok nog gauw ne emmer en melkt ok nog’n paar beeste. Jan zit luk te suffen onder de koo en Mina kik der geregeld achter hen hoo’t um geet. Zo noo en dan zeg ze: “Melk i’j eig’lijk nog wal?” Dan schrukke wear wakker en trök wear nearig wieter. Maor wieters geet’t vlot. Jan mot nog effen den drinkbak vol pompen en Mina ut melkgrei oetwasken en dan ut dagense grei wear oet en hup effen ut bedde in…en met at ze ligget slaopt ze al.
“Jan, Jan… Wi’j mot der oet… O, guttegut ut is al duuster… Kom Jan, wi’j wollen joo nog nao’t feest. Umme acht uur wilt de naobers der wezzen.” ’t Duurt effen veur Jan bi’j de poozetieven is maor dan heb ze in de gauwigheid de kleere an, effen luk water umme de kop umme de döppe oet de ogen te kriegen en dan zit ze in’n mum van tied op de fietse. Net as ton ze nao hoes gengen fietst Mmina wear zo’n meter of vieve veurop. “Kom wi’j mot anmaken, ‘k Wed dat de naobers zich’n ongelukke lachet dawwe der noo pas an komp.” “‘k Zeg wal dawwe ne koo melk kregen”, zeg Jan. “Ja, de naobers bunt gek dee wet net zo good as i’j wanneer wi’j der eene melk krieget… as i’j zelf... Kom an maken.” Mina jeg of ze in training is veur de tour de France. Zee stoevet bi’j de Menger de bochte umme en raozet op’t feest an.
Van de Menger köj zo op de feesttente kieket maor zo te zeene……Wat is ut toch duuster bi’j de tente…..zol’t electrisch kapot wezzen…?
Hoo korter dat ze bi’j de tente komt hoo langzamer at ze begint te fietsen…’t Is onbegriep’lijk zo stille at ut der is…At ze endelijke bi’j de tente bunt ister helemaol niks te doone……..Der lig nog luk pröttel rondumme de tente maor’t is der zo röstig as op’n karkhof…..Onbegriep’lijk….Dan nemp ze zich pas de tied umme is op’t horloge te kieken. Jan mot der ne lucifer veur ansteaken… Half veere,… “Oguttegut ut feest is allange af e’lopene!”…Mina dreait de fietse al umme en Jan stapt ok maor op…..’t Geet heel wat röstiger as ton ze der hen gengen……Zee praot’t zelfs neet……..In de wiedte köj al zeen dat ut lechter wordt….’t Is ne prachtigen zommernacht en ongetwiefeld morgen wear ne mooie dag…….Jan en Mina maken later maor’n smoesjen waorumme dat ze neet op’t feest wann’e’west….’t Hef jaorn e’duurt veur ze’t waogen te vertellen….Wat köj toch slaopen nao zo’n feest.