't Verhaal van Willem: Adam
Ik mot eerlijk toogevven, ik heb wal is meddelie'n met um e'had. Ut zal ow toch maor ovverkommen. I'j loopt daor as jongen kearl deur ut paradies, prachtig wear natuurlijk, prachtige blomen ovveral, geweldige natuur. Ut begunt ow eigenlijk al luk te kriebelen, wat wi'j, zonne jongenman. En dan inins dan kump ow daor ne prachtige jonge meid temeute, met alles der op en der an en nog poedelnaakt ok nog. Hee zal toch neet e'weet'ne hebben wat um ovverkwam. Ja, i'j en ikke, wi'j wazzen tot en met veur e'licht en wi'j wisten wat uns te doone stond ton ut grote moment daor was. Maor Adam? Hee wist toch van gin toeten of blaozen. Gin veurlichting e' had, gin leger van peadagogen en andere ogen naost, veur en achter um, um um bi'j te staone. Hee was gewoon an de Philistijnen ovver e'leverd.
Oetendelijke zal e'zich wal e'red hebben, anders wazze wi'j der zelfs neet e'west, maor ik gef ut ow te doone....
En later ton ut allemaole neet zo geweldig mear genk motte toch helemaol in de problemen e'komm'ne wezzen. Hee moch onderdak hebben, maor hoo en waor? Hoo zet i'j un hoes, zonder architect, zonder tekening, zonder bestemmingsplan, zonder adviescommissie zonder ok maor enige veurlichting. Hoo heffe zich e'red?? Good, hee had ok natuurlijk gin leu dee'm dwars wollen zitten en dee bezwaor in deenden. Of dee um op ne andere misselijke manneere teggenwarkten. Maor ok wazzen der gin advekööte en rechters dee de zaak maondenlank in behandeling konnen nemmen zodat nog lange zonder onderdak zat. Nea,'t mot un armzalig spil e'west wezzen.
Dan bunne wi'j toch beater af. Wi'j bunter nog neet ins dan staot der tröppe volk umme unze mooder hen umme ear te leiden en te begeleiden. Iets waor Eva ok al zonder mos doon. Good awwe in de weege ligt wordt'n trop nog groter en as mooder köj amper bi'j de weege kommen umme ow kind in de gaten te hollen. Trouwens in de ogen van al dee mensen dee ow begeleiden wilt buj toch totaal ongeschikt umme maor iets veur ow eigen kind te doone. I'j heb der toch gin opleiding veur e'had, gin studie veuraf, gin stage lopene of scriptie e'maakt. I'j bunt neet veur ne examencommissie e'west dee op één of andere manneere mot beoordelen hoo'j met zo'n kind mot umme gaon. En Adam en Eva dee zatten daor met ear earste kind en ze wisten van niks. Gin wonder dan ok dat Kain en Abel zich op de harsens slogen dat ut zo hasselen. Nea, dan bunne wi'j noo beater af. Legioenen peadagogen, verdeeld in tientallen commissies en comités en instanties staot en stonden naost uns umme uns veur'(of op) te lichten. Vandaor ok dat ut der in de wald noo heel wat vredelievender toogeet as in de earste dage in de wereld ton Adam en Eva oet ut paradies verwijderd wazzen.
Trouwens, genk dat maor zo? Heb ze zich daor maor zo bi'j neer e'leg? Hadden ze helemaol gin kans umme bezwaor te maken bi'j gemeentelijke en provinciale commissie? Konden ze de zaak neet in behandeling kriegen tot in de Raad van State too? Begin i'j zoetjes an in de gaten te kriegen waorumme ik zo'n meddelie'n hebbe met den Adam. Jah, hee mos ton ok op zien eigen houtje an de kost zeen te kommen, zonder enige veurlichting. Wat zal ik eaten. Ik könt wal zo wat nao binnen pakken, maor wat zit der in an koolhydraten, eiwitten en vet? Hoovölle calorieën zit der in? En hoovölle mag ik daorvan eaten zonder da'k der te dikke van worde of te mager van blieve. Krieg ik wal genog of te völle. Gin dieetisten, gin voedseldeskundigen, gin veurlichtingsbureaus. Mensenkinders, aj der toch good ovver an't denken komt, ut mot toch een vreselijk spil e'west wezzen. Trouwens hee hoven zich ok neet te barsten te warken umme an de belastingen te voldoone. Dat schol natuurlijk ok wear. Gin belastingen um al dee commissies te betalen en met öppers geld te subsidiëren. Daor Iepen hem trouwens gin leu veur de veute dee ut allemaole beater wisten, dee zo arrogant wazzen dat ze störug met de 'educatie' van andere mensen bezig wazzen en zich neet afvrogen of der ok wat an ear eigen educatie mankeerden. Dat schol natuurlijk ok wear ne hoop an argernisse. Maor toch, wat mot ut veur Adam een droevig spil e'west wezzen.