't Verhaal van Mina

's Woensdags gao'k altied nao darp. Bosschappen doon en zo maor ik gao der toch in hoofdzaak hen umme an de praot te kommen met allerhande leu. Och, i'j komt der altied wal wat teggen dee'k kenne en waor f 'j toch effen stille bi'j blieft staon. Earste de markt op, zeen of der nog wat bi'j zunders is . I'j bekiekt is van alles en dan gao 'k zo vanzelf de Misterade in en dan zo teggen elf uur kom ik dan vanzelf bi'j mien nichte dee door argens ne zaak heb en dee reakent der altied op da'k umme elf uur kom koffie drinken. 't Is altied hartstikke gezellig.

Afgelopen woensdag ok. 'k Bun nao darp e'fietst en zo langzamerhand met de fletse de markt ovver. Jao, de fletse nemp ik altied met want met al dee bosschoppen sjouw i'j ow zo'n ongelukke, dat wea'j wal en a'k noo de fletse hebbe dan kan'k de bosschoppen an 't stuur hangen en dan he'k der wieters niks gin last van. Earste op de mark zag ik Annie al. Gut deerne hoo geet ut? Dee is mi'j toch ok an't doktern e'west z'n leaven. Dee hef alle zeekten wal e'had dee'j oet könt vinden. 'k Geleuve at ze wal twaalf keere in"t zekenhoes e'leagene hef en tussenbeiden ok nog vief kindere kreggene. Dee bunt intussen ok al groot en de meesten bunt al e'trouwd of zee wont samen. Dat doot ze lever earste teggenwaordig. En of ze geliek heb. Wi'j kregen vrogger de kans neet maor anders hawwe dat ok wal e'daone. Noh, dee Annie hef altied wal'n verhaal, met de eene deerne is dit de andere hef dat, daor is der altied wal eene in verwachting of zee heb al 'n kind. En dan ister wear eene van zeek en zo lul i'j zo'n ende weg.

I'j weet wal hoo dat geet. In de Misterade kwam ik al Jo teggen dee steet bi'j de zang altied naost mi'j, dus door ok effen met e'praot ovver de repetitie. Wi'j bunt noo begonn'ne met ut Kerstrepertoire. Wi'j heb noo hele andere verskes.

Wal mooi heur. Umme noo eeuwig en altied Stille nacht te zingen en nu Sijt Wellecome, daor kriej endelijke wat van en i'j wilt dan endelijke wal is wat anders. Bi'j de Hema bun'k ok nog effen binnen e'west wat kleine dinge kopen en an de kasse ston Diny. Dee is e'trouwd met Gerrit en den is wear ne kammeraod van mienen Jan. En zodoende zeewe mekare nog wal is. Gerrit had ander wark. Earste wasse al bange dat ze'm ontslaon wollen maor dat is gelukkig veur hem neet deur e'gaone maor inins konne bi'j ne andern baas kommen en dat leek um net zo secuur. Diny is nogal langwielig in de praot. Zee weid altied enorm oet. Zee begunt en dan praot ze zo heel wenters rond...'t Is ne leuke meid wal maor zee verteld altied alles dubbel en dan wordt ut verhaal ok ins zo lang. Ondertussen hawwe beide boeten de fletse pakket en wi'j Iepen al praotende e hele Misterade af. An't ende waor vrogger den blauwvarver wonnen stonne wi'j nog effen te kieken...'t Is toch zoetjesan tied dat ze daor ok is wat an doot maor daor mot de grond vervuild wezzen van dat varven vrog......Oh gunst nog too , Ton beseffen ik inins dawwe al an't ende van de straote wazzen en ik was mien nichte allonge veurbi'j, moor dat was 't slimste nog neet maor ik zag inins da'k mien eigen fletse gaarneet hadde. Ha'k in gedachten daorbi'j de Hema helemaal ne verkeerde fletse met e'nomm'ne...Noh, ik bun nog nooit zo hard deur de Misterade lopene. Gelukkig ston mien eigen fletse der nog met de bosschoppen en al dus door was niks an de hand. Maor 't was wal stom of neet.
Ton worden ut tied da'k nao mien nichte genge. Dee was neet in hoes. Earn man wal moor zee was nog effen dorp in. Oh, dacht ik dan haal ik nog effen 'n cadeautje veur de kleinen van unze Anne den is zaoterdag jörig en omot toch wat metbrengen. Ik heb de fietse door laoten staon en bun zo effen wearumme lopen. 't Cadeautje e'koch en ton'k wear boeten kwamme kwam mien nichte door net in de wiedte an. Ha, dacht ik dee za'k is effen laoten schrikken. Ik gao door effen achter zo'n reclamebord staon en ton zee der vlak bi'j was kwam ik der inins achter hen en zea knoerhard Böööh!!! Zee schrok zich naar, dat was wal leuk, alleene ut was mien nichte gaarneet, 't was ne hele andere vrouwe moor met net zonne jas as mien nichte. Zee nam ut nog wal op ne lollige manneere op en wi'j stonnen nog bi'j mekare te lachen ton mien nichte der echt an kwam. Ton bun'k moor gauw met e'gaone en ton wi'j de koffie op hadden bun'k gauw wear nao hoes e'jag veur a'k nog meer domme dinge dee. Moor gezellig is 't wal luk bosschoppen doon...