't Verhaal van Willem: Old worden
Soms vin ik old wezzen wal leuk. Ik kan neet zeggen da'k ut vervelend vinne. Kiek aj noo domme dinge doot, dan kiekt ze ow misschien wal luk meewarig an, maor zee zegt der meteene bi'j: Noh jah, hee's al zevventig e'west!! Dooj leuke dinge waor iedereen enthousiast ovver is dan zegt ze: En hee is al zevventig e'west!! Nou, dat völt hartstikke met van dat olde knewwelken.
Wej wat ik wal vervelend vinne......i'j könt neet meer zo enthousiast wezzen ovver allerhande dinge. Kiek, daor komp altied van allerhande ni'je dinge. Ni'je dinge waor iedereene enthousiast ovver is, waor de kranten vol van staot, en waor iedereene ovver pröt atter un stel bi'j mekare zit.
Net as laatst, wi'j zatten met'n stel bi'j mekare waor völle jonk volk tussen zat, daor worden heel völle discuseerd, e'praot en e'rebbelt en waorovver?
Over computers natuurlijk. Aj un stel jonge keals bi'j mekare heb zitten dan wordt der ovver computers e'praot, jao, wat wi'j. De computers wordt van A tot Z besprokkene, de veur en de naodelen. En allerhande termen oet ut computer jargon davert deur de kamer. Hard en software, CD-roms, help-desk, besturingssystemen, Wwindows, browser, downlaoden, internetten, provideis, mega-bytes, hypertextlinks. apple en world-wide web, networkinformationcentre, netscape, Gopherstarter, menubalken ...........Woj nog meer weurde.
En daor zit ik dan bi'j. Ik heb ok ne computer al broek ik um in hoofdzaak as typemaskiene, dat is al ne openbaring. I'j könt der völle meer met as met ne olderwetse typemaskiene. Maor dat hej altied met ni'je dinge. En ut is ok wal leuk umme der iets an met te doone. Un betken e-mailen met miene klein-kindre is leuk en ok contacten met Amerikanen dee van alles wilt weten ovver earn stamboom of zo dat is ok gezellig en natuurlijk verwonder ik mi'j dan dat ut allemaole kan. Helemaol mooi wordt ut dan a'k inins heure.... en 'mijn moeder en vader begrijpen er helemaal niks van....helemaal niks!!'
Inplaats van dat ik 'met open mond'zit te lusterne zo at dee jonge kearls misschien denkt dwaalt miene gedachten as vanzelf nao de tied ton ik dartig wazze en enthousiast met miene kammeröö op de visite zat te kletsen. En waor ovver haw ut? Waor wi'j ut ovver hadden? Natuurlijk ovver auto's! Nederland was nao'n oorlog luk bi'j aojem e'komm'ne en iedereene had ut ovver auto's en wi'j as jonge kearls stonnen in de startblökke umme volop an ut grote verkeer deel te nemmen en met mekare praoten wi'j enthousiast ovver auto's. Grote auto's, kleine snelle auto's ovver differentielen, ovver schakelen van één nao twee nao dree en veere en dan in de ovverdrive, in luttele seconden tot ovver de honderd.
Dörme wazzen dee Dafjes ok neet in tel bi'j jonge kearls....automatisch...... haha....dat was iets veur aftandse kearlkes en opgedreugde schooljuffrouwen..
Wi'j praoten ovver vier, of zes cilinders, ovver krukassen, oetlaten, veur en achterbumpers, zommer en winterbenide, schokbrekers, verkeersexamens, verkeersborden, rotonde's en parkeren en file en autobanen en veurrangskruusingen...neum maor op....En awwe dan zo enthousiast te gange wazzen dan heurn i'j ok inins zeggen......En mien vader en mooder??? Zee begriept der de ballen neet van....Zee weet neet ins waor'wi'j't ovver heb. Niks begriept ze der van.....
En ik zag dee jonge kearls waor'k bi'j zatte in miene gedachten ovver dartig jaor al lustern nao eare jonges dee zeker eaven enthousiast zölt zitten praoten ovver ik weet neet wat veur apperaat of vervoermiddel. Daor zal zeker ovver dartig jaor wal iets wezzen waor wi'j noo nog gin weet van heb maor dat zeker ut enthousiasme zal opwekken van ut jonge volk en unze computerenthiousiastelingen van vandaage zit der as old kearlken bi'j te grölen en denkt ja ja ja.......en hee mot oppassen dat hee neet in ne daverende lachbuuje oetbarsterd atte dan ok inins beurt: En mien vader en mooder dee begriept der niks van. Dee weet helemaol neet waore wi'j ut ovver heb....niks begriept ze der van
Een hee zal ut ok inderdoed jommer vinden dat hee neet meer zo enthousiast kan met praoten en hee dech misschien wal.....Och, in dee computertied ton was ik ok zo......Ja ja, dörme vin'k ut ok wal's jommer umme older te wezzen....... en zol't fijn vinden umme ok enthiousiast met te doone zonder iedere keere te motten denken....ja ja....och, wi'j zeet ut wal.......