Drok
Timmerleu en andere bouwvakkers bunt verschrikkelijk drok, daor wet iedereene van met te praoten. Zeet der maor is eene te pakken te kriegen, zee heb gin tied! Hanneke was dan ok verschrikkelijk bli'j dat ear'n timmerman endelijke wol kommen. Zee hadden tuindeurn in't hoes. Daor was ze earste vreselijk bli'j met e'west. Tuindeurn geft cachet an 'n hoes. At 't zommers mooi wear was köj ze los zetten en zo op ut terras gaon zitten. Maor hoo vaake kwam ut veur? En tuindeurn verrot zo aj der bi'j'staot.
Daor moch iets an gebeurn en noo zol Hendrik dat effen opknappen, den ondersten halven meter gewoon verni'jen. De halve kamer moch natuurlijk löög e'haald worden, de banke weg, blomen weg, de taofele opschoeven en zukke dinge. Ton ze met de banke an't verzetten kwammen stoof der un muusken onderhen en kroop un ende wieter onder de kaste. "Oeh gat", zea Hanneken, "atter maor neet meer bunt."
"Oh daor köj op reaken", zea Hendrik, "aj der eene zeet bunter wal tiene." Tiene? Dan mog Hanneken maor gauw ne valle zetten. Ne moezenstappe met un stuksken keeze der op worden onder de kaste zat en jaowal, nog gin kwarteer later klappen de zaak dichte en had Hanneken den moes. Zee heel um wal haoste twee meter van zich af ton ze der met nao'n vuilnisbak leep en um daor plechtig in leet zakken. Gauw weer un ander stuksken keeze der op en wear onder de kaste zetten. Hanneken wos zich de hande en ging wear an't kokken.
Nao'n zetken schreeuwen Hendrik: "Hanneken, ik geleuva daj al wear ne moes heb.... Hanneken dook op kneene umme onder kaste te kieken en jaowal, zee had al wear ne moes in de valle. "Nou, dee hewwe mooi te pakken, wi'j bunt ear mooi te glad af". De valle worden wear op ni'j e'zat en i'j könt ut geleuven of neet maor nao'n uurken reep Hendrik Hanneken wear, hee dach dat ut wear zo wiet was en warempel wear ne moes. En daor genk ut hen, achtermekare moch Hanneken met de valle nao'n 'n vuilnisbak hen umme der ne moes in laoten zakken.Veur de meddag had ze der al vieve....
Oetgebreidt worden ut verhaal aan Jan verteld ton den 's meddags in hoes kwam eaten. Met mekare zatten ze rondumme de tuindeure te zeuken waor dee krenge toch in vredesnaame alle zeat'ne hadden. Ok de banke worden secuur e'inspecteerd op'n moezennust maor niks konden ze vinden wat der op leek.... I'j begriept der toch niks van. "Wes bli'j aj dizze heb", zea Jan en hee genk wear nao't wark.....
Hendrik kwam ok wear en genk wear duftug te gange, maor nao'n half uur reepe Hanneken wear met.... "Ik wet neet, maor'k geleuve........ ". En potstauzend nog an too, wear ne moes in de valle.... En zo genk ut wieter, Hendrik worden un köpken thee e'brach en met mekare bepraoten zee nog de muuzenplaoge. Jao, daor ko'j las van hebben, a'j dee krenge eenmaal in hoes hadden wa'j ze maor zo neet kwiet en met zonne kapotte tuindeure kregen ze umsgeliek de kans umme nao binnen te gaone.... At 't wear slechter wordt wilt dee ok geerne onder dak zitten. Zo worden der e'praot.
Maor nao'n half uur was ut wear zo laate.... Hanneken kon wear met de moezenvalle op'n vuilnisemmer an umme der wear eene af te levvern. En 't genk den helen meddag zo deur.... i'j konnen der de klokke haoste op lieke zetten. Hanneken zat bovven luk schoone te maken en bedden op te makene maor iedere keere reep Hendrik ear wear nao ondern, ut was wear zo wiet. I'j könt ut geleuven of neet, maor 's aovends had Hanneken inmiddels twaalf keere ne moes nao'n vuilnisemmer e'brach. Buh, ut groezelen der ear van.
Köj ow veurstellen daj as timmerman drok bunt al niks anders doot as iedere keere ne moes oet'n vuilnisemmer halen en op ni'j wear in de valle zetten?