Eierverzamelaar
Ik heb nog ne mooie foto van hem. Ne olderwetse hoge kaore barstend vol grote eierkisten. Daor konnen der 500 in en in sommige gevallen zelfs 600. Daor genke dan den boer met op umme bi'j ziene levveranciers de eiere op te halen. Jao, iedereene hadde hoondere. Neet völle maor allemaole wal wat en de eiere halen hee op dee dee dan in de kisten. Ik heb nog'n winkelbeuksken oet 1934 van leu waor hee de eiere ophaalden. De man zelf genk hen timmern en mooder verzorgden natuurlijk de hoondere. Zee heb meestied zonne vieftien tot twintig pond eiere in de weake dee brengt ear ongeveer un kwartjen ut pond op. Soms heb ze wal vieftien pond eiere. Acht eiere in'n pond, dan genk ut umme honderdtwintig eiere. Zevven daage in de weake dan geet dat dus per dag umme zevventien eiere. 's Winters dan legt ze neet zo völle dus dan geet ut umme zonne vief en twintig hoondere. Vieftien pond eiere á 'n kwartjen brengt ear dan dree viefenzevventig op. Dree vief en zevventig! Noo zoj zeggen: Dat is toch gin geld umme daorveur de hele weake achter zukke rot hoondere an te lopene. Dree vief en zevventig! Hoo hoo, dan moj neet zeggen. Want den eierkearl brech ear ok de winkelwaare met, de bosschoppen.
En wat dan wal allemaole? Noh, zee begunt met 2 pond weitemeal, iedere weake,. Daor pakt ze natuurlijk pannekooke van. dan 'n half pond koffie, 'n pond sokker. 'n Half pond tabak veur vader, 'n peksken thee , ne pakke lucifers en dan grei umme te waskene. 'n Pond soda, 'n pond zeepe, dat zal wal greune zeepe west wezzen en 'n stukke waszeepe. En al dee bosschoppen met mekare kost ear zegge en schrijve. Één gulden en zes en dartig cent. Daor gif den kearl ok nog 4% korting op. Teminsten dat zegge, maor daor vergisset hee zich wal's met. Veer % van ne gulden is bi'j hem meestied gin 4 cent maor maor dree, dus daor fommelt hee dan ne cent van weg maor al met al höld dee vrouwe van eare dree vief en zevventig eiergeld nog mooi twee twee en veartig ovver. Alle bosschoppen veur dee weake van dat eiergeld en nog geld too.
Aj dan reaket dat vader zaoterdags van zien wark twaalf gulden metbrach, dan is twee twee'n veartig mooi met e'nomm'ne, toch mooi geld. Twaalf gulden! Daor hadden ze nog geluk met, dat vader wark hadde, want warklozen kregen maor zevven gulden. Dan is ut teggenswaordig wal heel anders. Neet alleene verdeene wi'j völle meer maor wi'j koopt ok allerhande dinge deewe vrogger neet neudig hadden. Ik heb veur de aardigheid is nao e'kekkene wawwe dizze weake an winkelwaare met e'brach heb. Natuurlijk ok koffie, thee, sokker. Weitemeal neet meer. Neet dawwe gin pannekooke meer krieget. Vaake genog maor daor hewwe bakmeal veur. Tante Blank is der gaar neet meer, daor koj ut fornuus met schuurn. Lucifers ok neet, wi'j kokt elektrisch. Maor wej wat ze wal hef? Closetpapier, dat hawwe vrogger neet neudig. Daor hawwe de krante veur. Dee worden mooi an stuksken e'sneane en in 'n old sigaarkisteken klaor e'zat. Wej wanneer bi'j uns closetpapier in hoes kwam? Ton mooder last kreeg van aambeien. Maor van chips, bouillonblokjes, rijstbuiltjes, kittekat, leverpastei, wasavolkoren, lollies, stimorol en kittekat hawwe vrogger nooit e'heurt enne Galia-meloen? Vrogger nooit van e'heurt moor noo vinne wi'j't alle lekker al kost ut met mekare ok meer as 1.36.