'Zo Willem, buj ok in darp?'

Ik keek umme en zag'n vrendelijk gezichte van ne neet meer zo jonge vrouwe. Jao, ik was ok in darp. Ik kon't moeilijk ontkennen. 'k Leep deur de Misterstraote en ik wet neet hoo't ow geet, maor a'k daor lope kom ik altied bekenden teggen. Dan is effen met den praoten en dan is met den en meestied scheet ik neet zo hard op. Maor dizze vrouwe? In de tied dat ze gezellig wieter kletsen zat ik mi'j af te vraogen: Waor ken ik ear toch van? Of kennen? Ik kon ear met gin möggelijkheid thoes brengen. Misschien vrogger in de Harmonie e'zeene? 'k Wet neet, maor dee deerns staot mi'j alle nog good in't geheugen en daor heurn disse neet bi'j. Van de catechisatie? met gin möggelijkheid kon ik ear thoes brengen.

"Hej e'heurd dat hendrik in't zeekenhoes lig?" "Gut nea, wat hef den dan?" Ik dee maor net of mi'j Hendrik dagelijks veur de veute leep. "Hee wordt opereerd, misschien morgen al."
"Jao? is't slim dan?"
Ik kon mi'j Hendrik neet veurstellen laot staon da'k wiste wat um mankeerden.
"Och, hee had der achteraf allange las van. 's Nachts mogge der vaake oet, neet atte zo völle moch, maor hee had toch den andrang"
Hendrik zal't wal an't water hebben, dacht ik. "Jao, dat kan rot wezzen, he'k al wal's e'heurd."
"Jao, van tied krigge toch inins zo'n piene....ton hewwe den dokter e'beld...'s mons al vrog.....den hef um ton luk af e'tapt"
Juust, toch ut water. "En was 't toen beater?" vroog ik maor.
"Oh jao, dat was ne hele opluchting veur um, dat wet ik wal." "Jao, dat zal wal..." Gut mense dacht ik, k' wol da'k wiste wee'j wazzen....
"Jao, mien breur, i'j wet wal, mien oldste breur in Miste, den hef ut un jaor of wat geleane ok e'had....maor den hef der ok van e'lekket, dat wet ik wal"
Oh, oldste breur in Miste.....as ne film leet ik alle kearls dee eventueel as 'oldste breur oet Miste' in anmarking kwammen, an mi'j veurbi'j gaon...Maor ik kon ear met de beste wil van de wald neet thoes brengen.
"En noo ligge in't zeekenhoes, zea'j?"
"Jah, ton'n dokter der e'west is....wej wal, met dat aftap­pen....ton zegge: I'j mot toch maor's nao'n specialist. 't zal wal ne kleine operatie worden, zegge."
"Oh, jaa, i'j heurt't vaake..." Zea ik maor wear... mense wee buj toch?
"Jao, mien vader had der eerder ok völle last van, dat weaj denk ik ok nog wal....Den hef ton nog haoste ne maond in't zeekenhoes e'leagene."
"Oh," zea ik....Noo word'n helemaol mooi, noo mog ik ear vader ok nog e'kend hebben......Wee wazzen der vrogger opereard an't water?
"Jao, dat hef Enkelaar nog e'daone.....teggenwaordig hef ut neet zovölle mear op 't lief, zegt ze...." Vertel'n ze wieter. "Nea...", zea ik maor, "teggenswaordig völt dat nog wal met". Teminsten at ut ow eigen prostaat neet is, dacht ik... Ik bekeek ear nog is good maor ik kon ear met gin barstend geweld argens thoes brengen.
"I'j kiekt mi'j zo an", zea ze....."ik zee der ok neet best oet de leste tied, wat?"
"Och, zea'k," dat geet duch mi'j nog al..." 'k Wol da'k maor wiste hooj der eerder oet zogen....dacht ik. "Jah, ok al griep e'had, net as zovölle en dan dat gedoo met Hendrik, daor woj ok neet beater van."
"Nea, maor noo zölt ze'm wal gauw beater maken", zea'k.
"'t Is te hoppen, zo is't ok niks. Maor ik wet nog, mien vader tondertied, dat hef nog wal ne helen zet e'duurd veur't wear good in order hadde, ik bedoel...eh..."
Zee wol kennelijk neet hard op zeggen in de Misterstraote wat ze bedoelen maor ik begrep ut joo wal.
"Ik hoppe," zea ze," dan maor dat e' morgen e'holpene wordt."
"Dat zal dan nog wal ne spannenden dag worden", zea'k.
"Zeg dat wal, huuh, vanaovend za'k um vertell'n da'k met ow e'praot hebbe."
"Jao, doo um de groeten", zea'k maor, "en 't beste met um"
"Dat wet ik datte fijn vind, dat za'k um is zeggen...Kom'm maor is opzeuken."
"Atte der lange mot liggen, mo'k dat maor's doon", zea'k maor.

Misschien kan'k der in tussen achter kommen wee zee was en wee earn Hendrik is, dee't an de blaoze hef....
Hendrik, knap maor gauw op, da's ok al't enigste wa'k zeggen kanne.