Geboortebewies

Ik bun geboren op 19 meart 1926. Ik bun der natuurlijk zelf bi'j e'west maor't is gek, ik kan der mi'j niks meer van herinnern. Moor mien mooder en vader heb altied e'zeg da'k op 19 meart 1926 geboren bunne. 't Zal ok wal zo wezzen en ik heb ut ok altied wal geleuvet moor noo he'k ut zwart op wit. 't Is ech waor, ik bun geboren op 19 meart 1926. 'k Zal 't ow vertellen. 

Viftug jaor geleane heb ik ut riebewies e'haald. Un bewies dat ik in staat ben een motorrijtuig op vier wielen te besturen. Moor aj zo'n riebewies anvraoget dan moj un bewies hebben daj echt geboren bunt. Ja, stel ow veur dat ze ow een riebewies gevvet en i'j bunt gaarneet geboren. Dat zol un spil wezzen, lauwe eerlijk wezzen. I'j zölt door moor zo rond jagen en i'j bunter eig'lijk gaarneet. 

Dus ik bun nao't gemeentehoes e'gaone umme un bewies dat ik geboren bunne. Un geboortebewies. Dat kon, den meneer genk der echt veur zitten. Kreeg un breefken oet ne la, zo'n half A­ viertjen, 'n A-vijf jen dus en door vull'n hee secuur mien'n name in en den datum waarop ik geboren was. 19 meart 1926. Ut ston der secuur, moor hee hef ut earste precies nao e'kekkene op ne kaarte deete door oet ne kaste halen en door ston ut op. Geboren....19 meart 1926. Astebleef ow geboortebewies. Ja, tondertied praoten ze ok op ut gemeentehoes nog plat. 't Kosten natuurlijk wal wat, joh nog wat wi'j, den man hef door zitten schrieven, ut papeer mot betaald worden en daorbi'j ut is toch mooi daj bewiezen könt daj echt geboren bunt.

Anders mot ut de leu moor geleuven, moor noo kon'k zeggen. Astebleef bekiek ut moor, ik bun echt geboren.

Vief jaor later moch ik ut riebewies laoten verlengen en ton bleek da'k wear un geboortebewies mos halen op ut gemeentehoes. Jah, stel ow veur dat ze vief jaor eerder ne foute maket hadden en ow un bewies van geboorte hadden e'gevvene moor daj eigenlijk gaarneet geboren wazzen. Dus dan man keek wear op dee kaarte oet dee kaste en verduld ut bleek waor te wezzen. Ik was echt geboren dus den man genk wear fijn an't schrieven en met mooie letters schreeve secuur op'n breefken, Willem was echt geboren op 19 meart 1926.

Precies op mien verjaardag, noh wat wo'k mear.

Vief jaor later kreeg ik ter ere van ut feit da'k al tien jaor rond veurn in'ne auto un mooi getypt breefken da'k echt geboren wazze. Den kearl genk door mooi zitten veur de schriefmaskiene of hee zat der achter, 't is moor hoo'jt neumen wilt. ritteketitteketiktiken door ston ut mooi op papeer. 

Willem geboren op 19 meart 1926, echt waor, 't Steet der op. 't Was intussen iets duurder e'wordene moor wat wi'j, ut was noo getypt en dat is ok wat weard en daorbi'j ik kon ton duudelijk bewiezen dat ik geboren wazze. Aj't neet geleuvet, komt moor kieken. 't Steet der echt op Willem geboren op...eh Noh jah, dat weej intussen.

Moor wej wat zo mooi is, elke vief jaor kan ik gewoon röstig nao't gemeentehoes gaon en dan haal ik mi'j wear'n geboortebewies. Want elke keere zit i'j toch moor met de smartelijke onzekerheid of ik wal geboren bunne. Ik heb der noo tiene.

Tien breefkes waor precies op steet da'k geboren bunne. En wej wat ok zo mooi is, zee hooft neet mear op ne kaarte te kieken dee ze earste oet ne kaste mot halen. Neo. 't Zit noo in 'n computer. Zee drukket noo op'n paar knöppe en door rrrrrrrrrrrt daor kump'n mooi breefken an waor precies op steet wanneer ik geboren bunne op 19 meart 1926. 't Is echt waor. 

't Duurt neet lange mear of ik mot wear'n ni'j breefken halen. Jao, stel ow veur da'k viftig jaor in ne auto rond e'toert heb en noo blik da'k gaarneet geboren bunne. Maor 'k weet echt zeker da'k geboren bunne. 'Toch mooi zo'n geboortebewies, waor of neet, prachtig toch en dat veur 8 euro, geweldig. Veural aj der al tiene in hoes hebt.