Vervoer
Der is al heel wat af e'kletst ovver ut vervoer. De leu wilt noo eenmaol geerne van hier nao gunter en nog ut leefste zo gauw möggelijk. Teggenswaordig is dat neet zo'n groot probleem. Maor hoo zoll'n ze daor vrogger met e'daone hebben? Hobbelen ze in of op ne diligence met en stappen ze dan wear in andern?
Handelaren gengen van hier wal nao Amsterdam. De dominee beaten dan zondags der veur veur eare behouden thoeskomst. Zee zollen zonne ondersteuning wal neudig hebben. At ze in Wenters ne HBS wilt hebben goot ze zo gauw möggelijk nao Den Haag umme dat van mekare te kriegen. Zee redt dat vlot moor hoo reizen ze nao Den Haag zit ik mi'j wal is af te vraogen. In't Woold trouwt Gerrit Bennink met Maartjen van Zetten oet St. Maartensdijk. Ut zal best ne leuke meid e'west wezzen moor hoo kwam ze in vredesnaam in't Woold terechte? Ut was simpelder dan ik dachte. Gerrit was soldaote west en hee moch zelfs met nao België. Hoo kwamme daor, zoj zeggen. Op bolderwagens of lopend? 't Liekt mi'j beide niks. Natuurlijk zee mosten lopen. Soldaoten mot lopen vonnen ze vrogger. In 1939/40 toen der al vrachtauto's of bussen zat wazzen leten ze de soldaoten nog van hot nao haar lopen. Dat heurn der bi'j. In Breda kumpe Maartje teggen, dee zal daorwal argens dienstmeid e'west wezzen en zee zag schienbaor wal wat in den Achterheuker. In elk geval geet ze met'n nao't Wooldse. Helemaol van ut Zuuden oet nao't Woold. Ne hele reize veur zonne jongemeid. Zee mot nog anlopen ok want zee bunt nog moor amper hier of door kump'n ooievaar al anvlegen. Den jonge wordt Jan Willem e'neumt maor hee krig den naame Adriaan der nog bi'j. Door köj al an marken dat ut neet alleene ne Achterhookse angeleagenheid is. Zee kriegt der nog'n paar kindere bi'j en dan blik dat ze nog neet oet e'reist bunt. Zee gaot nao Amerika en de olders van Maartjen goot ok met. Ut echtpaar van Zetten zölt ear wal op e'wacht hebben in Rotterdam want ze staot met z'n allen op dezelfde passagierslieste. Zee heb dus wal contact met mekare holl'ne. Schrieven natuurlijk, moor hoolange wazzen de breeve onderweg? Gerrit en Maartjen wonnen op Leemkoele in't Woold, onder Lintum maor hee zal wal good met'n Heerschop e'könt hebben want hee schrif der geregeld hen atte in Amerika is. Hee stuurt um nog ne mooie foto van Long Beach waor hee wont en...ok nog un paar jonge beume. Mooi verpakt komt dee fijn in 't Woold an en stoot nog op't Lintum dapper te greuien. Zee heb un apart klein blad, volgens zeggen. Gerrit höld ut lange vol. Hee wordt 92 jaor. Zien'vroggeren pachtheer den um dan al viftug jaaor kwiet is nömp nog de möite umme in ne advertentie de leute vertellen dat hee bericht e'kreggene van ut ovverlieden van 'zijn beste vriend'. Kennelijk wazzen de verholdingen tussen Heerschop en pachter neet altied slecht.