Overall
Ik weet neet wee'm oet e'vonn'ne hef maor't is een van de makkelijkste kledingstukken dee de mensheid tot beschikking steet. De overall. Ik denk dat ze'm in Engeland ut earste had heb umdatte eigenlijk ovverall heet. Met twee II's. Over all. Ovver alles. Zo simpel as wat. 't Is ok zo'n 'n simpel idee den ovveral dat ut ow eigenlijk verwondern mot dat Adam der ok nog neet in rond leep.
Ik geleuve datte in de dartiger jaorn pas veur't earste gebroekt worden. Aj op Olde foto's kieket zee'j der prachtisch nooit eene met ne overal an. Maor in'n oorlog wann'n ze der al wal. Ze worden ton ok an e'raone veur vrouwleu, want vrouwleu met fladderende rökke zollen eerder last van brand kriegen as wanneer ze ne ovverall an hadden. 't Is zo makkelijk as wat. 's Morgens hupke i'j owwe kleere an, wat ut dan ok is en dan gauw den overal der ovver en klaor buj. Ok bi'j smearug wark, effen den overal der ovver en i'j holt de rest schoone en zonne overal is zo te waskene en schoone te maken.
Nea, dan aj in zo'n net pak mot. Dat is ne heisa, daor slao'j van achterovver. "trekt ow maor schoon ondergood an" zea mien mooder altied a'k nao darp wol. "I'j könt nooit weten wat ow ovverkump". Ze zag mi'j al onder ne auto en later in 't zeekenhoes terechte kommen met ondergood an dat neet al te fris mear was. Nea, schoon ondergood moj an, zeker aj der ok nog'n net pak bi'j antrokken. Dat vin ik ok altied un spil. Nao't ondergood mooie schoone sökke, daor mag ok gin rökke an zitten. Stel ow veur daj zweetveute heb en i'j zit op 't kantoor. Dat kan natuurlijk neet. A'j vrachtautochauffeur bunt is dat nog daor an too. En dan un ovverhemd, dat mot toch ok netkes wezzen. Glad e'strekkenen. Fijne manchetkneupe en natuurlijk un mooi bi'jpassend strik. Veural bi'jpassend. Dat hölt dus in da'j earste un half uur veur de kaste staot umme te kiezen. Wat veur strik mo'k hebben. Wat past ut beste bi'j dit ovverhemd. Zo buj nog wal ne zet te gange en dan he'k ut nog nins ovver ut pak, wat veur pak za'k antrekken. Ut blauwe natuurlijk want i'j heb al dat ovverhemd an dat daor bi'j past. Jao, maor dat haj gistern ok al an. Dus dan maor ut broene. Maor dan moj ok wear un ander ovverhemd an, un ander strik en dan blik ok nog dat de sökke der neet bi'j passed. Zo buj nog wal ne zet te gange, want geleuf maor daor geet tied in zitten.
Van't zommer ston ik ne keere 's morgens umme half zevvene an de weg op ne vrachtauto te wachtene waowe varkene met op wollen halen. Jao, in ovveral natuurlijk. Bi'j ne bouwmaterialen handel dee daor in de buurte lig trokken ton achter me kare vief grote vrachtwagens weg dee in Pruussen, denk ik, zand woll'n halen. De chauffeurs zwaaien allemaole mi'j un goeien morgen too. De mouwen van de overall's op e'streupt en lachend trokken ze de Rieksweg op richting de grenze. 't Was un mooi en haoste un machtig gezichte. Zo der op was ok den vrachtauto der, waor ik op zat te wachten en wi'j gengen meteene wieter, den boer op. Anderhalf uur later wawwe der wear en leet hee mi'j der wear oet. Juust op dat moment stak ne jongenman de weg ovver. Keurig in ut pak, mooi strik veur, haoste ovverdrevven gepoetste schoone. Maor hee keek verschrikkelijk sacherijnig. Moeizaam heele de fietse an't lopen. Ik ken um, he's ambtenaar argens op'n kantoor en i'j konnen zeen datte der teggenop zag. Gut gut wat is ut toch un ende op de fietse. Ik begon mi'j eigenlijk af te vraogen waorumme dee vrachtautochauffeurs umme half zevvene al beginnen könt en zonne ambtenaar pas umme half neggene...Maor ton ik ziene mooie kleere zagge ton dacht ik: Ja, gunst hee mot zich ok zo netkes antrekken, hee mot der zo fijn oetzeen. Hee's joo al uurn te gange wes . Hee kan ok neet vrogger op 't wark wezzen. Ik wazze bli'j dat ik dat neet hoven, ik had fijn ne overal an.