Vervolg van vorige week
Atter eene ovverleane was geng i'j nao'nnaoste naober en vertellen dat vader ovverleane was. En dan genk't hele spil an't dreajen an. De naosten naober genk de buurte rond: Naobers-Jan is ovverleane. Ovver'n half uur bi'j mekare kommen. De naoste naobervrouwleu gengen der al vaste hen umme koffie te zetten en zo. De familie moch e'waarschuwt worden, ik zea joo al daor was gin telefoon.. Onmiddellijk genk der ne naober op pad umme de naoste familie op de heugte te brengen. Soms twee of dree boerno verschillende kante op. Dat mog ut stoffelijk ovverschot verzorgd worden, der mos ne kiste besteld worden. Den brach den annemmer 's aovends en den heelp ok bi'j't kisten. Den doonboer kreeg bericht, den mog veurn met de groove, de naobers moggen natuurlijk dreagen. Den dominee worden e'waarschuwd en den dokter. En dan moggen de naobers der op oet umme te leu oet te neugen veur de groove. Der worden breefkes e'maakt waor de namen op stonden en daor moggen de naobers dan met op pad. Ondertussen worden ut hoes op orde maakt want atter zovölle volk kwam poch de boel der kant bi'j liggen. En met de groove, de vrouwleu moggen zorgen veur koffie en zo. Den doonboer moch earste de liekkoetse halen. De kiste worden op deale zat, net onder't balkengat, den domnee sprak en tenslotte sloot den annemmer de kiste. Met een grawskent geloed kropen de schroeven in ut hold. Dan genkt op 't karkhof an, ok lopend al dee kilometers. Dörme gengen de vrouwleu neet met, zelfs de eigen vrouwe neet. Van't karkhof gengen ze nog effen naor 't café veur de naogroove. Koffie met'n borreltje. Dan genk ut wear nao't hof en dan reaken de naobers met mekare af.
A'j e'slacht hadden kwammen de naobers vetpriezen, ut varken bekieken en daor zat natuurlijk ok luk un versietken an vaste. Vaake kregen ze dan ok nog ne friske metworste met, fris vleis was toch hartstikke lekker. At den naober dan slachten kreej der eene wear. De naobers, ten allen tied köj der op reaken, ok noo nog, al is ut bi'j völle dinge neet meer neudig. De begavenissen wordt verzorgt deur den begravenisondernemer. Maor dreagen doot de naobers nog altied en ok verzorgt de naobervrouwleu nog de koffie. Ut wark op de boerderi'je gebeurt noo machinaal maor bi'jspringen at neudig is doot ze nog. En waorumme zo'j dan met mekare ok gin feest hollen of toch wat gezelligheid op touw zetten. Wi'j versiert met mekare ne wagen en dan veure wi'j met naor uns feest. Ins in't jaor gauwe met mekare ne dag fietsen, de helen dag Wenters rond of ok wal iets ovver de grenze en dat sloete wi'j dan af met un gezellig dineetje.
Oh, heurden ik is vertellen, oh maar die sociale controle in zo'n buurt....?? Ik mag er niet aan denken? Wat ne flauwekul, ut is gin sociale controle maor metleaven. At bi'j ow breur de ambulance veur de deure steet vraog i'j toch ok wat der in vredesnaame an de hand is?? Al dee dinge met mekare betekent dat den naoberschop onmisbaor is en ne belangrieke steun is in ut gemeenschappelijk buurtleaven. Ut is toch logisch aj dan is alleen der op oet gengen daj dachten an den naoberschop. Dan zingen van: ik Genk der op oet de wal bekieken.