Amsterdam
"Ik bleeve net zo leef in hoes', zea Gerriet, "wat wi'j toch in vredesnaame in Amsterdam doon?" Maor Mina von ut geweldig. Drek ton ze ut lot e'koch hadde van de muziekvereniging had ze al ut geveul e'had dat zee'n earsten pries kreeg; Een weekend nao Amsterdam. En laot ze noo'n earsten pries winnen. En noo zol ut gebeurn. Gerriet en Mina met mekare nao Amsterdam! Met 'n trein!
Daor was ut al met begonn'ne. Met 'n trein nao Amsterdam. In Arnhem ovverstappen. Gerriet dee geerne autoveurn was völle lever met 'n auto gaone. "Binnen twee uur buwwe der, niks gin gesjouw met 'n koffer". Normaal nömpe den auto nog haoste met atte nao 't huusken mot, en dan noo in 'n trein gaon zitten. Jao, met 'n trein köj met 'n koffer zitten sjouwen van 'n eenen trein nao 'n andern. En in 'n trein ok nog en aj in Amsterdam bunt/ wear opni'j..
"O. maor wi'j gaot met'n taxi!", zea Mina. Jao, of dee vlak bi'j 'n trein staot, I'j könt nog wal lopen motten van hier tot bi'j de Melder. Den koffer hooft ok eigenlijk neet met, von Gerriet. "Ik doo mi' j de pyama wal achter'n jas", zea hee. "Ogoet", zea Mina, "Hoo kom i'j der bi'j. Bu'j neet wies. Ik mot toch 'n extrao kleed met en schoon ondergoed!"
"Schoon ondergoed?", zea Gerriet," Ik trek in hoes ok neet alle daage schoon ondergood an en waorumme dan wel in Amsterdam?"
Mina vond dat Gerriet der neet völle van begreep. Aj oet gaot en zeker aj nao Amsterdam wilt moj goeie kleere an hebben. Dus zaoterdag's morgens ston ze met ear beiden op 't station en reizen met ear beiden richting Arnhem. Steggeman in Miste was an 't kunstmest zeajen. Dat had Gerriet ok volle lever e'daone. En de Kresser hadde al pinken boeten lopen. Dat word'n bi'j ear ok hoge tied. In Aalten kwam Klein-Entink oet de Heurne bi'j ear zitten, dee wollen met ear beiden nao Zevenaar waor ear dochter wont. Gerriet is vrogger met Klein-Entink onder dienst e'west en zodoonde kent ze mekare good. Zee zatten met mekare zo ovver'n dienst te praoten en olde herinneringen op te halen dat Klein-Entink haoste vergat oet te stappen.
In Arnhem ovverstappen en nao'n dik uur wann'n ze al in Amsterdam. Gerriet zeulen den koffer met nao boeten."'t Is verdorie net owwe met mekare wal dree weake nao Siberiè gaot, zovölle he'j wal met e'nomm'ne...."
"I'j hebt nooit tevölle bi'j ow", zea Mina. Daor kan ow van alles ovverkonunen en dan he'j drek schoone klere neudig. Den taxi brach ear fijn nao 't hotel en in 't hotel wazzen ze ok de vrendelijkheid zelfe. Ne knappen jonge met'n fijn peksken brach ear nao de kamer. Ne mooie kamer, dat was't zeker. Netkes en schoone. En met twee èènpersoons bedden.
"Kan'k teminsten is röstug in bedde liggen", zea Mina", met twee man in bedde gif drek zukke verplichtigingen. Maor fijn at' t zo mooi schoone was.
"'t Moch der nog bi' j kommen dat 't smearug was", zea Gerriet. Maor't was prima van mekare.'n Fijn bad, ok nog. "Daor gauwe van aovend met mekare in", zea Mina en zee begon der van te giechelne." Dan zeep ik ow earste in, en dan met mekare in 't water." Maar Gerriet zag ut neet zitten. "Ak ut spil hier zee kost der ne boddel wal dree maol zovölle as in Wenters", zea hee.
"Ach, I'j ok altied ovver de boddels."
"Awwe oet gaot en ik zal nog gin boddel drinken dan hawwe zeker in hoes motten blieven."
"Wi'j gaot earste de stad in", zea Mina. En dat dee'n ze ok. 't Was helemaal neet zo wiet lopen of zee wazzen al op 'n Dam. En ton de Kalverstraote in. 't Was der ovveral vreselijk drok.
"Hold ut tasjen met stevvig ondern arm", zea Gerriet. "En i'j de portemonnee", zea Mina.
Gerriet stellen al gauw veur umme argens te gaon zitten. Hee hadde wal zin an'n cognacjen. Zee gengen argens an'n teafelken zitten en Gerriet bestellen 'n cognacjen en veur Mina'n gleasken rood. De kelner brach'n groot glas veur Gerriet met' n klein slumpken der onder in. "Mi'j duch daar had nog wal meer in e'kont", zea Gerriet.
"Als meneer er een tientjen voor over heeft doen we er nog een scheutje bij in", zea den kearl. 'n Tientjen? Gerriet verslook zich haoste in dat kleine betken cognac watte kreggene hadde. Ongemarkt kwammen ze ok nog in de rosse buurte. "'k zee mi' j zelf al zitten veur zonne roete", zea Mina ton ze nao dee half blote vrouwleu keek dee daor veur't raam zatten. Een grote donkere deerne zat ok veur't raam. Zee had ok neet völle an en wat ze an hadde was ear nog te klein. "Ak daor met nao bedde zal", zea Gerriet, " dan wo'k geld too hebben..."
's Aovends bunt ze ok nog nao Carré e'west. Mooie deernkes hupken ovver't toneel. Fijne muziek. Alles was good in orde. Alleene zatten ze der zo wiet af. En hooge. . . . .Mina heel zich met beide hande an Gerriet vast alleene umdat ze bange was dat ze nao ondern zol vallen.
"Potverdikke", zea Gerriet later," wat bun'k meu in de beene, dat gegengel deur de stad daor wo'j joo bekaf van". "Zee laggen nog neet zo lange in bedde ton Mina zea: " Gerriet, slaap i'j al?" Gerriet grommen maor wat...."Mag ik bi'j ow in kroepen", vroog Mina," ik vind ut helemaal neet fijn, zo alleene...." En effen later nusseln ze zich lekker teggen Gerriet an en zee kon neet laoten um um ok nog te kietelen.
"Noo lig i'j in Amsterdam met' n wief in bedde", giegeln ze. Maor Gerriet leet zich natuurlijk ok neet onbetuugd. Zo worden ut nog ne wilde boel in dat èèn-persoons bedde....
Later dreumen Gerriet datte met ne dikke donkere deerne in bad zat. Zee had zich helemaal in e'zeepet en ovveral was ze eaven glibberig. Maar Gerriet wol der niks van weten en dee niks as miern umme oet dat bad te kommen. Maar net atte dach datte der oet was trok dat vrommens um an de beene wear in bad. Endelijke namme ne sprong en met ne zwaai lagge.........naost bedde....
Hinkend isse later wear nao't station e'lopene want hee had nog lelijk zien been verstoeket. Zee bunt maor wear op tied nao hoes e'reizet....want Jan dach at dee rooie koo ok nog wal's melk kon worden.......!