Haaze
Neet dat Hendrik noo zo gek was van streupen. Mee had ut eig'lijk nooit e'daone.
Moor zien'n kammerood hadde verteld datte veur ne haaze toch altied wal zonne dree-veer gulden kreeg en dat was mooi met e'nomm'ne. En hier Iepen joo hazen zat. En zo had Hendrik is ne keere un strik e'zat en verduld gistern zat der ne lummel van ne haaze in. Veer gulden zeker. Nou, dat zol um good oet kommen met Sunt Steffen. Want dan wolle nao de Harmonie. Daor was't dansen. Maor dat kosten natuurlijk geld.
Good, hee had ne haaze, maor noo mogge der nog eene vinden dee um daor dree-veer gulden veur gaf. Hee had 'n helen dag al zitten prakkezearn waor hee der met hen mog maor der was der gin eene dee'm wat leek. Opkeupers wazzen der zat maor dee gavven ow zeker niks te völle. Maor inins wis hee ut, den dominee!!
Hee genk der met nao'n dominee. Hee vertell'n bi'j boer waor hee denen datte nog effen nao darp wol. Hee wol zich veur de Karstdaage de heure nog laoten snie'n. Noh jah, den boer zea der niks van en zodoende genk Hendrik op weg met'n haaze. In gedachten zatte al met veer gulden in de Harmonie, dan kon 'm ok is ne kere lostrekken. En zo stonne al gauw op de hooge stoepe bi'j'n dominee. Hee trok an de belle en ut geklingel galmen deur de hoogen gank. En, umdatte nog maor niks heurn trokke effen later nog maor wear's an de belle...
Ja ja, kalm maor an....heurn hee Mina, de olde meid van'n dominee foetern. De'wald is neet raozend e'maket....i'j kont wal rhenen daj gek könt worden wanneer i'j wilt maor zo is ut ok nog neet.
Nao volle gerammel met slöttels en ut schoeven van ne grundel genk endelijke de deure lös en ston Mina um an te kieken. Ja, wat ister?? Ja, hee wol'n dominee wal's spreaken. Hej dan wat bezunders? Wee buj eig'lijk? Oh ik zee ut al, i'j bunt ne jonge van Boskempers-Dieneken. Buj gin knech bi'j Vaornink? Hee kon't neet ontkennen maor dat ze zien moeder Boskempers Dieneken neumen hadde nog nooit e'heurt. Daor he'k vrogger met nao schoole gaone, zee de olde Mina, tamelijk pinnig. Wat moj met'n dominee?? Dat za'k 'n dominee zelf wal zeggen, zea Hendrik. I'j mot anders neet menen dat den man niks anders te doone hef as met boernjonges op de stoepe staon te lullen. Hee hef vanne weake al dree graven e'had en nog ne trouweri'je en noo isse drok met de preaken veur de Karstdaage...maor'k zal wal 's zeen watte zeg. Mina sloffen nao achtern waor ze argens op ne deure kloppen. Hendrik heurn wat gemompel waor hee ut woord vaornink nog van op veeng. Ton kwam den dominee nao veurn.
Zo jongeman, wat ister an de hand? Ja, ik wol is zeen of'n dominee ok zin hadde in ne haaze? Een haas? Wie ben je eigenlijk, Mina had het over Vaornink. Ja, daor bun'k as knech.
Oh, nu begrijp ik het, en je wou me een haas brengen. Ja, Voornink heeft me maandag op de diaconievergadering beloofd dat hij mij een haas zou bezorgen. Dat heeft hij gauw voor elkaar gemaakt.
Den dominee nam ut pekskken ovver en zea wieter Nou dan moet je je baas maar de hartelijke groeten overbrengen.