Puun
M'n zwaoger kreeg kors bezeuk van twee politieagenten . Zee hadden twee fraaie luchtfoto's bi'j zich die gemaakt wazzen vanoet ne helicopter. Daor op koj dudelijk zeen datte naost ut hoes wat puun hadde liggen. Hee's zien hoes an't verbouwen en earste natuurlijk wat muurn oet e'brokkene en dat puun lag achter't hoes. En dat mag neet!
Gebrokken puin wal. En hee vertellen natuurlijk datte van plan was ut puun te breaken en ut op te ruumen, at de verbouw achter de rugge was, want daor was natuurlijk nog meer puun in aantocht. Jao, maor hee was gewaarschuwd. Mee moch u zo snel möggelijk opruumen. Dat belovvene natuurlijk. Der wordt nogal is e'nööld ovver de politie maor i'j kont toch neet zeggen dat ze neet actief bunt. Denk maor's in, ne helicopter, compleet met piloot en 'n duur fototoestel, leuke foto's, twee politieagenten met auto. Veur'n betken puun dat gin eenen boer langer achter't hoes löt liggen as absoluut neudig is. 't Lig altied in de weage. Wi'j heb ut wiet e'brach in Nederland vind ik. Hier is ok ne man den hef un leuk bos, daor leep vrogger Meister Meinen al, ten Houten en ok de NJN leep der vrogger völle. Dat leuke bos datter alleene nog moor is dankzij hem en ziene familie. Der is natuurlijk völle bos weg e'komm'ne maor dizze familie hef ut bos daor e'laotene en ok altied onderholl'ne . I'j zoll'n zeggen dawwe daor mowwe met z'n allen dankbaar veur wezzen.'n Mooi bos! Ut ist er toch maor en tot veur kort was iedereene der welkom net zo welkom as vrogger meister Meinen, ten Houten en de NJN-ers.
Nea, dankbaor bunt ze dus neet, den boer dee der veur e'zorgt hef dat dat bos der bleef wordt noo as ne halven crimineel beschouwt en wordt op e'zadelt met tal van regels en verorderingen waor hee zich an te hollen hef. Achter den bos heffe nog ne weide liggen dee hee alleene bereiken kan via un weggetjen dwars deur u bos. Daor motte dus geregeld ovver hen met den tractor en wagen en soms met de machine's deete hef. Daor wordt zo'n weggesken neet beater van. En tonne luk puun ovver hadde heffe dat in dee geatre daone. Noo leep der laatst ne dame deur den bos. En 'n good uur later kwammen der twee politieagenten um um ne bekeuring bezorgen en dat leep oet op ne neet zo kinderachtige boete. De agenten neumen de dame natuurlijk neet maor leten good marken dat ze stuurt wazzen. De boer mot ut puun wear op ruumen en de moddegeatre wordt alleene maor groter. Der kwam nog un groot artikel in de krante met de kop: Boer vervuilt natuurgebied met puin. Jah, natuurgebied datter alleene nog is dankzij hem en ziene familie .I'j kont ow veurstellen dat den boer neet zit te wachten op nog meer bezeuk dee um misschien nog meer bekeuringen op ut dak stuurt. Met ut gevolg datte iedereene verzóch neet meer fijn te gaon wandelen in dat bos. Hee hef gin behoefte meer an dat bezeuk. Noo is ut natuurlijk ne groten rotboer, gut, wi'j wandelt toch alleene maor.
Völle boern bunt de laatste jaorn behandeld as dizzen boer met zien mooie bos. Wat hej der noo an umme de sfeer tussen de boern en andere leu te bedarven. Alleene umme ne schoefkaore vol puun. Waor gin mense las van hef en ok niks benaodeeld. Ok de natuur neet. Gin mense hef wat an zo'n gezeur en zeker de natuur neet. Der wordt alleene maor bereiket dat iedern wandelaar dee is gezellig ut boetengebied in wil, hoo vrendelijk en goodwillend ook, wantrouwig wordt bekekkene.