Beume
Strak en gespannen zatte naost mi'j. Dat marken ik al ton ik nog maor amper van hoes weg veurden. Maor ton ik heel gezellig bi'j uns op de Geessinkweg deur de bochten slingern begonne helemaol wit af te trekken. "Hej hier vaake ongelukken?" vroege ton. Jao, mooi in 't Engels want ut was ne Amerikaan dee daor naost mi'j zat. "Wat dooj toch in vredesnaame met al dee beume hier langs de weg, dat is joo leavensgeveurlijk", zeate ton. Leavensgeveurlijk? Eig'lijk ha'k der nooit zo bi'j e'dach. "Hoovölle jaagt der zich hier dood teggen ne boom an in 't jaor? " Jah, völ te völle.
"Wat dooj dan ok met dee idioote beume, daor staot er joo wieters zat hier in de buske!" En hee von dawwe de weage hier wal is luk rechter konnen maken. Al dee kromme weage dat kosten toch vrees'lijk volle grond. Jao, wat dooj met dee idioote beume, daor staot er joo wieters zat. Maor de weage recht maken zag ik ok neet zo zitten.
Ton dacht ik an al dee kleine monumentjes langs de weg ter herinnering an de leu dee hier bi'j ns boom ear ende vonn'ne hadden. Daor staot er al zovölle dat ze ut al wal verbeen wilt. At dee monumentjes trekt te völle aandacht van de weggebroekers en dan kriej ongelukken. Dee ongelukken komt dan deur de monumentjes, maor neet deur de beume. Later ton ik um bezochte reed hee met mi'j ovver de weage bi'j ear, keersrecht en zonder beume. Wat un idioote brede berme he'j hier toch", zea ik. Dee berme wazzen haoste net zo breed as de weg zelf. Kiek, dat von ik wear raar. En eig'lijk wol ik ok wal is liek kritiek laoten heurn. "Waor woj dan 's winters den snee laoten", zea hee, "atter is twee meter dikke völt." Daor ha'k notuurlijk neet bi'j stille staone.
Haoste veertig jaor geteane heb ze hier de grote weg op e'knapt. De weg breder e'maakt, ne secundeare weg der naost, bochten rechter e' trokkene. En tegeliekemheb ze ton ok de beume daale maket. Dat gaf direct un good ovverzicht op de weg. ledereene was der bli'j met, Kindere dee ovver mot steaken heb noo beater zicht op de weg. Noo heb ze hier grote plannen umme de natuur te helpen te greuien, te bleuien en zich oet te breiden. En de grote plannenmakers heb der zich wat moois bi'j oet evonn'ne. Wi'j gaot wear mooie beume potten langs de weg. Dan wordt ut op de duur wear ne prachtige laane. Zee kwammen met visioenen andreagen ovver ne soort Middachterallee. dat was toch prachtig. Jao, de Middachterallee is prachtig, Maor dee leu hier heb andere visioenen. Dee zeef de kindere dee nao schoole mot, moeizaam ovversteaken En ze heb meteene kleine monumentjes in de gedachten ter herinnert an....jah, an wee...wee is ut volgende slachoffer?
Natuurlijk al dee plannenmakers beed royaal inspraak an en meteen velen de bezwaorschriften bi'j ear in de busse. Oh jao, zee heb der volop begrip veur. Ja ja, u hebt misschien gelijk maar.......Zee doot er gewoon niks op. Daor was gewoon ne ni'je inspraak ronde neudig. En noo. En wear reagen ut bezwaorschriften. Ja, ze willen al die bezwaren meenemen in hun besprekingen. Hoovölle dooien hej hier in 't jaor van mensen dee teggen ne boom jaget, vroog de Amerikaan. In elk geval völ te völle. Hoppelijk nemt ze dat ok met in eare besprekingen..