Un ni'j hoes
Jan hef um ni'j hoes! En un mooi hoes, prachtig, is veur 100% in orde. Wat zeg ik? Wal veur 120 procent. Dat kan ok neet anders want hee hef ut zelf e'bouwd. Hee's zelf annemmer en hee wist natuurlijk precies hoo't hebben wol. Maor ut is nog groter e'wordene dan hee zelf wol. bat moch oetendelijke van de ambtenaarn. Dee wisten nog beaertas Jan hoo ut moch. Ja, dee ambtenaarn? Jan kon der endelijke wal van kotsen. Want dee heb um notabene elf jaor an't lijntjen e'holl'ne veur atte moch bouwen. Ja, i'j least ut good ! Elf jaor ! Elf jaor lank heffe achter dee kearls an e'lopene tot ze'm dan endelijke de vergunning gavven. Moj is naogaon. Elf jaor lank bunt ambtenaren der met an de gange west. Elf jaor lank heb ze eare uurn der an bestead. Allemaole betaalde uurn, good betaald, denk ik. Tenslotte mot dee kearls ok leaven. Maor ut mot duch mi'j verschrikkelijk wezzen daj elf jaor lank zit te mierne hooj zonne man dee maor zo un hoes wil zetten, zo volle möggelijk dwars kont zitten. Elke keere moj maor wear iets oet prakkezearn waorumme den man absoluut zien'n zin neef kan kriegen. Tot ze nao elf jaor der niks meer an doon konnen.Jao, echt, elf jaor!!
Eigelijk moggen der wal vieftien aanhalingstekens achter staon want ik vind ut ne geweldige prestatie, elf jaor zo gefrustreerd an de gange wezzen. Oetendelijke wisten ze niks meer, alleene vonden ze dat dat hoes groter moch wezzen as Jan wol. Noh jah, dach Jan dan maor iets groter. Hoo lange zol ut nog duurn veurdat iedereene in de gaten hef dat ut toch un wonderlijk gedoo is. Ut zol toch veur dee ambtenaren leuker wezzen at ze endelijke is normaal an't wark konnen wezzen. Ister noo nooit is eene, dee met de voest op taofele wög te slaone en zeg: En noo is ut potverhierengunter oet met dat gezanik. A'k dat gedoo zo anheure mo'k altied denken an de ambtenan'j vrogger an de grenze. Ik heb is ut geneugen e'had umme ne map vol procesverbalen te möggen inzeen . Allemaole op e'steld deur douane's dee meenden dat ze geweldig wark deden. In de busse waor deerns met nao de fabriek hen gingen vind ze un peksken sigaretten. Een peksken sigaretten. Ut is van gin mense maor zee maakt der un rapport van op of der twaalf man vermoord is en of ze achteraf nog dree lieke vonn'n heb in'n kattenbak. Eén peksken sigaretten. Ne man den zien schoonmooder wil bezeuken wordt e'trappeerd met ne treeze vol eiere. Dee heffe in'n auto liggen. Dat mag neet!! Dat motte toch begriepen. Dus wordt der un rapport van op e'maakt in drievoud waor den ambtenaar dree kwarteer met an de gange is. Dee dree kwarteer heb dree maol zovölle kostet as de eiere weard wazzen. Ins ston ne chauffeur, dee ik good kennen, met ne vracht varkene an de grenze. Zee wazzen der achter e'komm'ne dat hee ut verkeerde formulier bi'j zich hadde. Un blauw formulier mogge hebben, ut was wal ne copie van ut rooie formulier dat hee bi'j zich hadde, maor hee moch ut blauwe hebben, Dus de baas opbellen en den moch um ut formulier naobrengen. Van oet Dedemsvaart. Laot den man noo ut witte formulier met brengen. Nea, ut moch ut blauwe wezzen.
Terugge....! Wear nao Dedemsvaart en al dee tied stonnen de varkene in de hette daor an de grenze in de zunne. De dierenbescherming, altied geweldig actief, dee der niks op.
A'k noo de grenze ovver gao, dan mark ik der niks meer van. Gin hekken, gin prikkeldraod, gin riegen ambtenaren met un gewear, wat zeg ik, un gewear. Nea, ne echten stengun ondern arm en toch geef alles gewoon deur. Ut löp as un orgel, zonder ambtenaren. Zol dat in'n bouw ok neet können??