Ramp
Nao den verschrikkelijken ramp in Azië schot mi'j natuurlijk ok den ramp in de gedachten dee de Wenterswiekers ovverkwam dee in 1847 nao Amerika wollen. Ut wazzen meest wat ze ton de afgescheidenen neumden waor later de gereformeerde karke oet ontstaone is. In ut geheelgaot in aug. 1847 dree tröppe Wenterswiekers nao Amerika in ut geheel 310 man. Daor zollen noo is in veertien daage tied ovver de dreehonderd man van hieroet nao Amerika gaon, ik denke dat dat oetgebreidt deur de kranten en ik denk ok wal veur de televisie behandelt worden. Maor in Wenterswiek neet.
Ik heb de raodsverslaage oet de maond Aug/1847 der is op nao e'kekkene maor daor wordt neet ovver dee emigranten e'praot. Zee heb alleene maor narigheid ovver ne Ikink. Den armen man is gek e'worden en op e'nomm'ne in Warnsveld. Noo geet ut der umme wee dat betalen mot, de gemeente of de Roomse karke. êin mense praot in den raod ovver dee emigranten. Laot ze gaon, zölt ze wal e'dach hebben. Unze afgescheidenen gaot dus weg. Dat heb ze allemaole neet fijn e'vonn'ne. De karke an'n zunnebrink hef tweehonderd leden en daor gaot der 150 van e'weg.
Ton moggen de andere 50 natuurlijk opdreaien veur de onkosten dee ze met mekare al e'maakt hebt. Maor 19 Aug. gaot ze weg. Dan dee'n ze vaake, nao'n bouw, dan kannen ze de rogge nog te gelde maken en dat geld met nemmen. Zee gaot met de France van Rotterdam nao New-York en dan met ne boote nao Albany en vandaar met de trekschuite nao Buffallo. Ne lange zwaore reize. De meesten zölt veurtied nooit de zee e'zeene hebben. Begin November bunt ze in Buffallo en vandaar gaot ze met de Phoenix op Wisconsin an via de grote meren daor. Zee laadt onderweg nog holt inumme de keatels te stokken, daor blieft ze nog'n zetken liggen umdat ut zo'n slech wear is.
Ut volk zit daor,'t is zaoterdagavond met mekare achter op ut schip psalmen te zingen. Laate den avond gaot ze toch weg en 's nachts markt ze dat ut schip in brand e'komm'ne is. Ut zal ne verschrikkelijken paniek e'worden wezzen. Daor bunt maor twee reddingboten waarvan der eene ok nog maor eene riem hef. Ut verhaal geet dat Derk Voskoele oet Miste hef helpen roeien me ne bezzem. Nog geen vief mijl van de plaatse waor ze hen wilt staot de leu veur de keuze of in ut water springen dat steenkold is of verbranden. Maor daor was eigenlijk gin keuze want ok de leu dee in ut water sprongen komt umme . Meer as tweehonderd man kump umme. Ne viftig bunter maor e'red.. Noo zolle wi'j ut 's aovends al weten maor ton duurden ut nogal. Te Winkel oe+ Miste schrif in Januarie in zien dagbook dat zien breur e'schrevvene hef van den groten ramp. Ziene kindere bunt ok umme komm'ne.
De dominee's laot ut in de krante zetten en zo wordt ut bekend. In Bredevoort en in Wenterswiek in de karke wordt der nog coltecteerd veur de geredden. Maor ut brech neet zovölte op. Earste veertig gulden en later nog is dartig. Maor in dee tied was ut misschien wal volle...Noo is den ramp met 200 slachtoffers natuurlijk neet te vergelieken met de ramp van noo in Azië met ziene 150.000 slachtoffers. En noo köwwe ut ok beater met maken deur de TV. Dat höld natuurlijk in dat unze hölpe der nao wezzen mot. Vandaage wil Slingeland FM der op inhööken en zee hoppet dat ze ok un beheurlijk bedrag kont ovvermaken. Leu, doot der good an met en denk der an dat ut ok noo beater is te gewen dan te ontvangen.