Wegwarker
Korts aovends zag ik dat olders en zelfs grootolders van schoolkindere met 'n tuin bi'j de schoole an de gange wazzen. 't Roet most der oet en zo. I'j kent dat wal. Vrogger dee dat 'n wegwarker, en den heeng ok de vlagge op at de könninginne jörig was. Maor dat kan teggenwaordig neet meer. Gin mense hef mi'j nog oet können leggen waorumme dat dat noo neet meer kan. Maor 't zal wal zo motten.
Jao, vrogger had haoste iedere buurte zien eigen wegwarker. Hee mos alle weage verzorgen in unze buurte. 'n Unzen was ne pittigen man dee'j alle daage wal argens op de weg konnen antreffen. Hee maken de gravens schoone , an wearskanten van de weg. Hee verzorgen de berme. Meien al ut grös en zorgen ok dat den afval weg kwam. Ne enkele keere halen hee der wal is ne boer bi'j met de stortkaore umme de rotzooi weg te brengen. Heel enkelt moch um den ok helpen met de grösmaskiene at ut grös langs de weg te hard greuien. Ok bekeek hee de weg secuur en at der is ne beschadiging was dan zorgen hee der veur dat dat gauw op e'knapt was. At der is un plesken water argens bleef staon dan groof hee'n götken, zodat dat water weg kon lopen. Met 't feest dan ko'j der op reaken dat de weg waort'n optocht langs kwam extrao netkes was. En dan onderheel hee'n hof dan bi'j de schoole en heeng op tied de vlagge oet en halen um ok op tied wear weg. Nea, hee hadde alles prima van mekare.
En 's zaoterdags, jao, hee mog natuurlijk ok op zaoterdagmorgen warken, dan leepe alle weage dee hee moch onderhollen langs met de panne op 'n nakke en zorgen dat alle peardeköttele en andere ongerechtigheden wegkwammen. Hee begon vlak bi'j thoes en leep dan van Veldzicht langs Vardink op 'n Griesen an, an wearumme umme ok dat korte ende nao Sievert schoone te maken. Dan werarumme en genk van Smid Wisselink op Slatman an. Dan was ut ondertussen wal tied veur koffie maor dee ston meestied bi'j Slatman wal klaor veur um. Dan leepe nog effen dat ende op de Beemer an en dan wearumme. Van de schoole op de rieksweg an en dan mogge nog effen de Beakerinkstegge doon. Dan leepe wearumme nao schoole en dan vandaor wear op Vardink an en dan slooge nog effen linksaf de Haverkampstegge in tot an de baane. En ovveral smeet hee de peardeköttele in'n barm en zorgen der veur dat allen pröttel weg kwam en dan lag de grinte der wear prachtig bi'j en dan was ut ondertussen wal meddag en konne nao hoes.
Ins wasse daor met te gange ton Kremers-Gait der langs kwam. Den had ton al ne auto en den had soms de neiging umme is leuk te wezzen. Hee heel bi'j 'n wegwarker stille dreaien de roete nao ondern en zea: Dooj zoiets lever as arbeiden?"
Den wegwarker zea der neet völle op. Hee schrapen met de panne nog luk peardeköttele bi'j mekare en smeet ze ton met ne zwaai bi tj Gait deur't raam hen: "Astebleef,"zea hee", dee doot ow vanaond maor op de botterham !" 'k Wet neet of Gait dat ok e'daone hef.